【代糖夫人信箱】小朋友開心上學去,和平真好

stu

夫人:

夫人你好,我系一個小三學生,因為學校好多測驗,功課又多,搞到我成日好大壓力,成日喊,成日胃痛,好想死牙,究竟點解我地要返學讀書??

小麵上

*** ***

小麵:

夫人雖然無仔女,不過都好關心教育問題,首先應該係「呀」,而唔係「牙」。夫人火氣大既時候通常直接「牙你老母」就算……好喇,小學生要做TSA,升中都有壓力,日日就係返學,係學校度鳩坐六七個鐘,對身體唔好、對精神唔好,仲要學唔到咩實際野或者好野,係好慘既,但夫人同你講喇,你要搞清楚返學唔等於學習。你要搞清楚concept同現實,呢度係香港﹗

返學只係返學,通常唔會學到野;考試都唔係為左測試你有冇學到野——你媽咪Daddy同老師係咪都咁樣成日同你講?錯哂喇,大人就最鐘意呃鳩小朋友既,例如我地會成日話同你儲埋啲利是,等你將來大個讀大學果時用。

考試只係為左要你地自相殘殺。七百萬人,不鬥行嗎。咁撚多學生,我地點樣分邊個升到班、讀到大學啊?逐個了解下你地有咩才能、有咩夢想、有咩岩呀?好撚麻煩喎,要好多資源喎,點做呀,有錢都起多兩個故宮博物館幫習主席宣示主權啦。

所以考試就最efficient喇,以前夫人個年代,殺兩次就會分到邊個生、邊個死。十個人裡面,殺剩兩至三個人,咁佢地就有得讀大學喇,然後我地大人會再呃鳩你,話依家咩都唔好理,讀到大學就等於有未來架喇,當然等於你地啲利是錢,我地大人都係使左去既……依家你地個教育制度仲進步,考一次就殺到夠。以前毛主席鬥人之前,都係設定一個數,拿,死夠呢個quota先可以停架。

其實咩考試呀、教育呀,都係為左殺人,唔係我地大人點handle你地呀?我地有產階級成日叫人讀多啲書,唔係之後邊有人俾我地剝削啊?每日係學校度困六七個鐘(或者更多),愛因斯坦都會變蠢人,咁係因為我地唔想個世界咁多愛因斯坦、馬丁路德金甚至Malcolm X,我地唔想個社會動蕩啊,買唔起樓既人就永遠買唔起樓,和平真好~

祝 日日開心上學

代糖夫人上

發表迴響

你的電子郵件位址並不會被公開。 必要欄位標記為 *

Rating*