【代糖夫人信箱】無樓學咩人過情人節呀?

 

代糖夫人你好:

小弟今年二十四歲,今年同女朋友係第一次過情人節,究竟情人節要做咩先可以令佢留低難忘既回憶?

心急仔上

******

心急仔:

情人節,好多人會教你去邊度食野、去邊度做咩浪漫既野,夫人我個年代咪咩沙灘點蠟燭、蛋糕裡面有個吊咀果類囉。但最重要既係咩呢?就係啪啪啪﹗情人節,大家幾浪漫都好,最後如果唔以啪啪啪埋尾,就好似梗係差啲野。好似食菜唔食飯、示威唔掟氣油彈咁。

好喇。如果你同你女朋友唔係拍左兩三日,對方又唔係信耶穌,咁啪啪啪就係一個情人節要研究既重點喇。

首先要問你:有冇樓?

冇樓?冇樓咪即係無得舒適地啪啪啪囉﹗無樓學咩人過情人節呀?

依家好多人話呀,無樓唔知點結婚。夫人想講,無樓點解要結婚呀?唔通大家結左婚,夜晚又係各自返歸訓?咁去邊度啪呢?男方屋企又可能成村人,女方屋企又話唔好意思,叫床都唔好意思啦,香港地啲樓隔音好差架。

地產佬點解咁大支野呀?點解啲發水樓都咁L多人買呀?因為香港人要扑野呀,無樓邊度有得扑野呀。你生出黎,就有扑野既需要,走唔甩架,地產佬係食硬你架。你係基咩?基咪又要啪啪啪?所以「結婚要買樓」,都係隔左一層既講法,「冇樓冇得啪」,先係事情既真象。

夫人梗係知道人到左某個年紀,就想結婚,成家立室。但如果無得立室,都去結婚,咁只係表面做左個儀式,裡面冇實質架。

最近香港好興泡菜野呀。旺角有一檔賣韓式甜品既,叫雪糕鯛魚燒,好似一個鯛魚燒加唔同雪糕同生果包埋一齊咁,好紅呀,次次都大排長龍,去到夜晚九點就話賣哂,好大支野。

夫人有晚見到一家三口黎到,老細話賣哂喇,咁果一家三口就好失望啦,夫人一路食一路睇住佢地,個爸爸突然同個女講:「呀女﹗你問果個姐姐(即係本夫人),借佢果份雪糕鯛魚燒黎,我地影張相,咁咪好似食左咁囉﹗」個女同個媽咪塊面擺出一個「唔L係呀?」既樣,夫人我攞住份雪糕鯛魚燒,O左嘴咁望隻佢地,個呀媽最後爆左一句:「妖~~你個女係想食呀﹗影左張相有咩用?」

夫人我覺得呢位媽咪講得好好。表面風光既野有咩用先?最緊要食到呀嘛。你同個雪糕鯛魚燒影左相,擺左上facebook呃到幾十個like,有咩用呀?成個Facebook都係黃絲帶啦,爭取到野咩?攞左張婚書,連自由扑野既空間都冇,有冇悲哀左少少呀?

最悲哀都唔係依家個局面好悲哀呀,係啲人咁都無野,好似個世界冇問題咁呀。婚?照結囉﹗結左但係馬上分居。結左婚,完成左人生大事喇——但其實連一個屬於自己既「家」都買唔起呀,鄉下啲農民都冇香港人咁L折墮呀。

點解會咁呀?因為出面有人玩野呀。越有錢就越玩得起呀。你今年廿四歲,除非你老豆苦幹啦,唔好話同女女自由扑野,你送份禮物都頭痕啦。依家港女鍾意咩呀?Pandora呀﹗一粒粒果啲呀。點解會有Pandroa呀?因為有廠商玩野囉﹗越多粒珠就代表你越愛佢呀。

點樣可以令你女朋友留下深刻回憶?梗係儲錢買樓然後啪啪啪啦。我計你一個月賺一萬蚊,只要你死慳死抵、努力上進、行路返工、餐風飲露………再加埋你老豆俾你既二百萬首期,你就可以買到樓,情人節就可以浪漫一番之後啪啪啪,做哂成套儀式喇﹗

PS:如果唔小心中出,唔使即飛既。但記得叫你女朋友去搵醫生,唔好去藥房執藥呀,有病應該去睇醫生,唔應該去藥房架﹗

祝 早日實現性愛自由
代糖夫人上

發表迴響

你的電子郵件位址並不會被公開。 必要欄位標記為 *

Rating*