【代糖夫人信箱】社運女朋友

代糖夫人:

我今年Year1,男友上左大學之後成日搞社運,識左個社運女仔,之後我發現佢地有路,佢最近飛左我呀﹗好唔開心﹗佢話同我溝通唔到,話我係個膚淺港女,同果個女仔就溝通到,想問下社運女仔有咩咁特別?

唔開心人上

*******

唔開心人:

雖然咁講好行,但真係想講:唔使唔開心喎。你前男友未食過社運女仔,梗係好開心啦。你黑心啲諗,唔使幾耐你就會睇到你男朋友俾人飛。點解啊?社運男朋友同社運女朋友係點樣產生既呢?點解社運人成日要搞活動、搞遊行、搞讀書會、無野都要搵啲野搞呀?因為佢地既男女關係係project-based既,無project就無得食仔食女。

等於你男朋友,熱血青年呀嘛,對社會有理想嘛,想改變世界呀嘛,所以咪搞抗爭活動囉,一搞活動,見黎見去都係果個小圈子,搞搞下搞埋上床有幾奇。可以有幾認真呢?深耕細作,都係講下既者,落區?落得幾多次?團火可以維持幾耐?一個月?三個月?搞佔領果時,幾多人一個入帳幕,兩個人出黎呀?雖然係金鐘道係彌敦道扑野,你呢世都可能冇第二次機會,但呢啲野都唔荒會長久既,因為社運男朋友女朋友既交友模式係咁既:

搞抗爭——>識左一班人——>同現任男/女朋友無時間見——>齋扑——>覺得同現任心靈溝通唔到——>轉投社運男/女朋友——>一起解散,抗爭得到階段勝利——>搞新抗爭——>識左一班人——>同現任男/女朋友無時間見——>齋扑——>覺得同現任心靈溝通唔到………Loop落去。

社運人感情豐富、打破資本主義父權規範,所以咁loop法有咩出奇呀?

你前男友話你係港女,呢個係因為佢覺得社運女朋友好有理想,好有fire﹗果種係咩fire呢?就係去超市又話你屈服於地產霸權、睇水著寫真又話你物化女性、唔鍾意女人胳肋底有毛又話你父權,要保衛留毛毛既權利,為了毛毛會「無畏無懼」,不會屈服於性暴力,大喊「我必定會戰鬥到底,絕不低頭!」,咁好好咩?

如果你有個男朋友,一日到黑講既家國大事,但做緊既又只係自high行為藝術;一日到黑就口講反對資本主義,但就攞住部iPhone Macbook係匯豐前面搞真.佔領中環,唱歌跳舞,人地衝又阻住人衝,有咩行為係虛偽同港女過呢啲呀?

男仔點解會鍾意社運女仔?傻豬囉。社運圈係小圈子,無論係意識形態定係交友關係都一律係交叉感染、近親繁殖,耐左唔只會智力下降,你男朋友到時可能發現個個社運兄弟都係自己襟兄,真係夠哂社會主義、夠哂世界大同。到時個傻豬豬返黎求你都唔好理佢呀。

祝 早日搵個唔係社運圈既男朋友
代糖夫人上

發表迴響

你的電子郵件位址並不會被公開。 必要欄位標記為 *

Rating*