【代糖夫人信箱】係老人院門口扑野

代糖夫人,

小妹係第一次寄信俾妳既心煩人。今次好大鑊牙。妳上次叫我有樓先摸胸,我就無再同果個無樓既男仔A君出街同摸胸喇,呢排同左一個有樓既男仔B君出街。新年果晚我地出去飲野啦,情到濃時佢想摸胸,我問:「你有冇樓架!」佢話:「有﹗而且係豪宅黎﹗」但去到樓下,佢一時唔記得帶鎖匙,叫我係老人院門口之前同佢做住先。我果下咪信左佢囉。

點知果晚俾人影低左,依家上哂報牙,點算好牙。A君今日whatsapp我,問我果幾張相裡面果個係咪我。佢仲話佢已經搵到另一個女朋友,話自己無樓但係起碼唔會打野戰喎~我好唔開心牙,我果下發現自己仲鍾意佢,好唔鍾意佢有左第二個,我應該點做好?

心煩人上

******

心煩人:

嘩心煩人,你知唔知騙徒既手法層出不窮,唔單係指女仔化妝同落妝既分別架。摸胸前梗係要買樓啦,但有冇樓邊個知呀。梁朝偉同劉德華講,我係警察;劉德華冷笑一聲:邊個知呀?

幾L多男仔去玩果時話自己住維多利亞壹號呀,然後帶你返到樓下就話無帶鎖匙,不如係後樓梯搞住先,扑完就一起解散,有冇樓,邊個知?整色整水,咪呃到你袋住先,俾人係野外食左囉。無樓就扑野,咪好似未有民主,就信住個承諾高呼「回歸」班白痴愛國「知識份子」咁囉——有冇民主,最後邊個知?

同你扑野果個B君,怕且都係買唔起樓既芸芸眾生之一。你兩個係戶外扑野,其實都算係面向地產財閥既抗爭,強烈控訴後現代資本主義社會對性行為既「物化」同空間管制。所以A君問起,你咪話你「抗爭」緊囉。抗爭者頭上有光環,做咩都得。何止戶外扑野?偷食偷到返屋企,俾個正印發現,又得;舊愛係政壇中伏,馬上出來數臭佢又得,總之妹妹你都做返個奇女子,世人既目光係仁慈好多。

由狄娜到叶露西一系列奇女子,做間諜又有光環,正式係一路做雞一路起貞節牌坊。A君聽到你係老人院面前原來係進行緊一個咁偉大既社運工程,佢無理由嬲你掛,仲可能會改觀添。你係咪真係抗爭,無關係格﹗你事後「論述」一輪,扯埋女性主義、女權、平權、性別平等之類一堆詞語,一野車埋去,佢就多數收皮,可能仲會煮個面俾你同B君食添﹗

至於你話你發現你仲鍾意A君,但依家人地有左第二條女喎。你自己都周圍食,巧巧jack,介介jack,食到上哂報,你又有咩資格唔鍾意人地周圍食呀?人地officially同你無關係架。人地走,唔使搞退戀公投架,大學學生會都唔係奉旨入你個學聯賊竇啦,A君又唔係同你拍拖,你唔鍾意都要睇下自己咩身世啊。

其身不正,何以正人?(呢句唔明skip左佢啦)賊竇個秘書長都唔係普選既,濫權既、小圈子選既,但佢地又叫中共叫香港要普選喎;你自己又唔係聖女,又有咩stand去期望A君係痴心情長劍啊。當然咁諗野都唔係唔得,矯情矛盾左少少者。

A君你就唔好諗喇,佢又冇樓,摸胸好麻煩,第時一個唔好彩又要係外面摸,又俾人拍低。不如諗下,以妳咁既潛質,依家又紅左,有冇打算加入社運圈做婦權主義者?

PS:牙牙牙牙你老母咩。「呀」字同「牙」字係兩回事來架傻豬。
代糖夫人上

發表迴響

你的電子郵件位址並不會被公開。 必要欄位標記為 *

Rating*