【代糖夫人信箱】捉姦在床就要分手 邊個最高興?

夫人你好:

小妹今年廿三歲,有個由小學就識落既姊妹叫清汶。咁我就同男朋友同居既,有日返到去,發現清汶同我男朋友兩條肉咁係張床道,我即刻爆喊,奪門而出啦。

之後我男朋友話,佢唔想同我分手但我接受唔到!最傷心既就係最好朋友既姊妹搶我男朋友!都唔知佢地暗裡開始左幾耐!但我又諗,如果我真係同佢分手,清汶咪最開心?佢地咪名正言順風流快活?夫人我應該點做?

灰機妹上

******

灰機妹:

點解你會咁戇鳩,先去考慮情敵開唔開心先架?情敵開唔開心,你理撚得佢咩。個男人爛到入心,你都唔會想繼續一齊架啦,但你竟然因為唔想清汶咁開心,而令自己唔開心,勉強自己去同個仆街男人一齊?會唔會有啲本末倒置呢?

做人梗係關心自己開唔開心先架啦。個仆街男人依家就想食兩家茶禮,你又想食、清汶又想食,最好你地領惦數,起雙飛,3P佢就最高興呀,但你自己點諗先?你想走,就走架啦,清汶高唔高興,你理L得佢咩?

就好似班大學生話唔要再係學聯裡面喇,要分手喇,成班學聯新舊老鬼出黎話,喂你地同學聯分手,中共最高興呀。屌咩,學聯係宇宙無敵唯一反共機構?八大學生會又唔係老奉同你一齊既,走唔走考慮既就係自己開唔開心,中共係咪最開心,理L得佢咩?中共係咪食左興奮劑,所以佢日日都咁高興?幾百年前天主教啲神父走去搞啲細路仔(當然依家都係繼續搞緊)、燒死啲女人話佢地係巫婆,你話佢唔岩,佢都一樣會話,你咁批評我,撒旦最高興﹗屌咩,你班變態佬係上帝唯一代言人?你學聯就代表反共架喇?

如果你唔想清汶高興,就繼續同你條仆街男朋友一齊,你自己唔會高興,但條仆街佬就會好高興呀。你咁都接受到,不如你地兩女共侍一夫啦。成日諗人地高唔高興,你咪無左自己囉。你想做自己,定係共產黨、清汶肚裡面一條蟲先?

即刻飛左條仆街,中出都唔使,輕省乾淨呀。

祝退戀之後日日好似共產黨咁開心
代糖夫人上

發表迴響

你的電子郵件位址並不會被公開。 必要欄位標記為 *

Rating*