【代糖夫人信箱】床都上唔到 就連份糧都冇咗

代糖夫人你好:

上個月識咗個女仔,成日三五日就話咩「今日係我哋x星期紀念日」之後就要我請佢做呢樣果樣。床都上唔到,就連份糧都冇咗。夫人,請問我應該點做好呢?

學人溝女嘅窮撚上

********

學人溝女嘅窮撚:

女仔多數都好著緊「紀念日」既,好正常者,愛情呢啲野無形無相,咪無安全感囉。其實大家都係咁架喎,你睇下班政治家,雨傘革命一個月又話要重返金鐘;兩個月、三個月、四個月都要出個Post,寫本書,曝下光。咩野節日同紀念日,都係俾個藉口大家搞啲野、做下生意。就好似你女朋友,識左一個星期,就話:「BB豬,今日係我地相識一星期紀念﹗」,跟手就可以叫你請佢去食半島自助餐。紀念日呢啲野,好使好用,夫人我後生既時候都用唔少。

唔好話相識一星期啦,就算係你隔離屋個鄰居死左,你都可以用黎做紀念日架。好似六四事件一周年、兩周年,到依家廿幾周年,香港班政治人社運人咪用黎做生意呀、籌款呀、出書呀、開talk呀,幾開心呀,大家又有個機會出黎影相、上報紙。

去維園燭光晚會,同你女朋友叫你請佢食燭光晚餐,其實無咩分別架喳。去燭光晚會得到心靈既快樂,去食燭光晚餐就得到肉體既快樂,分別只係心靈既快樂好廉價,你去維園可能只需要付出車錢、同人迫下,就已經成為關心社會、心懷中國既知識份子公民,已經為「建設民主中國」出左力;至於去食燭光晚餐就貴得多喇,計下條數夫人都係覺得去維園燭光晚會比較抵。

你使左幾多錢,同你同佢上唔上到床,係兩回事黎架。你要睇下自己負唔負擔得起,同埋佢值唔值得你繼續付出囉。你係可以無左成份糧,都溝唔到條女架。啲香港人夠訓街訓左七十九日啦,佢地都爭取唔到任何野咩?

令到公民覺醒、散播民主種子,係啲政治戲子呃人既說話黎既者,係春成果咩?就好似你女朋友同你講,今日我地係相識一星期紀念日長征去半島食野,已經得到階段性勝利,你心裡面都屌一聲啦。你係想上床丫嘛,你係要埋牙肉搏先係目的呀嘛。如果你好鍾意個女仔,咁你要記住自己既目標,努力面前,向著標竿直跑,唔好扮扮下情聖,扮到連自己都入埋戲。

咪話夫人唔提你,個女仔同你講:「我係鍾意你架BB豬,其實我地得閒行下街、食下野,都已經係一齊啦係咪?」你千萬唔好信呀,一個女仔正正常常無信耶穌既話,真係鍾意你,點會無慾望同你上床?爭取唔到民主既民主運動又點會叫有成果?但如果你個銀包頂唔順,決定放棄呢個女仔喇,咁你都不妨同自己講,其實付出左咁多錢,已經得到階段性勝利,輸都輸得好漂亮。反正你都放棄左啦,用下精神勝利法,打下飛機,令自己容易接受啲,都無話錯既。

你還有山,放棄左就去下行山囉,行返一頭半個月,返出黎就係新造的人啦。

祝你盡快成功同女朋友深耕細作
代糖夫人上

圖片來源

發表迴響

你的電子郵件位址並不會被公開。 必要欄位標記為 *

Rating*