《天與地》，跟紅與頂白

因為係無線九半劇《天與地》裡面Dr. Dylan既一句：

「你睇吓我地呢個世界睇下我地呢個城市係乜野樣，除咗錢呢個字之外，我地已經分辦唔出是非黑白，我地每個人都被環境訓練到，好似倒模出嚟咁。鍾意食同一樣既嘢、鐘意同一樣電視節目、支持同一種政治立場，信奉同一種生死病死的做人方法，this city is dying, you know？」

立即就引來眾多網民既瘋狂分享同讚賞。但譽滿Facebook，謗亦隨之。好似林奕華就話「我並沒有為一部電視劇一段「罕見」台詞便生起興奮的情緒，正如政​客的誠懇可以只是為他的政治目的服務。他們是否真能帶來改變，要​看他們的演說，到底是演技，還是信念。致於台詞，架空來讀不如放​回context裏來看」引自林奕華facebook status。另外，係周博賢既post裡面，AJ Ron就話：「這麼輕輕一句, 就可以變成不一樣的電視節目, 不一樣的電視臺?太便宜了」」引自周博賢facebook status。

其實我唔知有幾多冷嘲熱諷既人真係有睇過套劇。當佢地見到大家係度讚呢段對白既時候，就立即推論認為大家只係因為一句對白就鐘意套劇、甚至對TVB既觀感都改變埋。係咪傻撚左？其實呢啲人何嘗唔係因為只係見到好多人係Facebook度Share套戲既呢個現象，就急不及待出黎話大家膚淺呢？反正世事都俾佢地看透哂，呢啲高人真係唔講得笑。

有人支持，有人就要反對到底。跟紅頂白係一個普遍現象。就算做文化既亦都唔例外。要講《天與地》，首先就要講編審周旭明。你唔搞清楚TVB既人事關係，你係無可能明白《天與地》既特殊之處係邊。

TVB既劇組一向係流水式、工廠式咁樣整劇。其實唔只周旭明，TVB既編劇其實私底下有好多新橋，但係最後都無可能採用。因為TVB既制度係行政同埋監制獨大，創作人員既權力好細。你地唸得再多好野，都只會俾一D無品味又無能力既老野BAN橋。一啲惡俗既監製自然會令到啲編劇交啲惡俗既野出黎。始終編劇都要出糧，監制要咁你又可以點？最後就係啲編劇會心裡面不情不願地交出一啲垃圾，好似《公主嫁到》(咁岩又係佘詩曼同陳豪)同埋好大堆熟口熟面既劇。果時無意間行過電視睇過下，呢套野可能係我呢世睇過最惡俗既劇集。

咁點解周旭明既野唔同呢？一來係周旭明自己既才華，但決定性既始終係有一個高層欣賞佢，佢既咩橋都受。又放生左周旭明，令到佢唔使機器式咁倒模劇集出黎。由於有高層「撐腰」，所以佢寫劇係可以有時間有空間，精雕細琢到一年寫一部都得。所以佢既劇無論題材同質素都唔似TVB自己既劇。TVB既劇垃圾，係因為人事，而周旭明既戲好，亦係因為人事。你鐘唔鐘意都好，事實要搞得清楚。

《天與地》既好並唔係果D引起迴響既對白咁簡單。唔計佢既大橋、角色設定、對白、場口都係一貫咁有水準，最重要既就係套劇流露既現實感。夾BAND既青春歲月係追尋理想，而現實既時空就充滿壓抑同無奈。呢套野「食人」果part只係個表相。林保怡、陳豪、黃德斌點解要食左家明呢？係為左生存。呢套野係講一班曾經有理想有熱肉既人點樣係一個弱肉強食既現實世界生存。係生存、奮鬥、自我救贖。一套港劇竟然會有咁寫實係好少見，你亦都唔可以係美劇日劇度搵到呢啲對香港社會既觀察。當然講工運、金融騙局、李氏力場、林公公、搖滾精神，有時事感既人會睇得過癮，但都只係菜頭菜尾而已。

一個故事，最緊要都係人物。陳豪既自毀式作惡、林保怡強烈既壓抑都寫得好好睇。林保怡同老婆既疏離婚姻係寫得好好。一個男人可以忍受到老婆出去滾，就算全世界都知道，佢自己都唔肯承認，係因為佢實在對食左家明太過內疚。佢覺得自己對全世界唔住，而佢為左令自己良心好過啲去搞工運幫人，長期唔理個老婆。所以老婆走佬，佢都無底氣去嬲。一個人矛盾同自毀到咁，其實係現實生活十分常見。有好多人都會好似佘詩曼咁夜晚訓唔著，然後起身做啲無聊野，或者始終對一D以往既事耿耿於懷。加埋果D面對著世俗、大環境既壓力，果種失落同埋迷失既情懷，先係周旭明既戲好睇同扣人心弦既地方。《金枝慾孽》、《火舞黃沙》都係傳統戲格局，但一樣好睇，都係同樣原因。

突然間有人讚TVB既劇，有啲屎忽癢同High Class既人就話，一定係香港人食得太多屎，所以有少少飯食就已經好開心。我就覺得係有啲人食得太多屎，搞到味覺退化，俾返美酒佳餚佢都無哂胃口，真係可憐。

Tags | 廣東話, 戲劇